Nagpaliwanag ang foster parent ng Chinese national na si Zhang Jiale at dumipensa sa pagtatapon nito ng taho sa isang pulis.
Ayon sa foster parent ni Zhang na si Oscar Bautista Saplato ng Calasiao, Pangasinan, bago ang insidente sa MRT ay isang linggo ng may sakit ang dayuhan.
Hindi anya ito nakakapasok sa klase kaya tensyonado sa mga na-miss na gawain sa eskwelahan.
Katwiran ng foster parent, lumabas lamang si Zhang para bumili ng gamit sa eskwelahan at hindi nito alam na bawal magpasok ng pagkain sa MRT.
Hindi anya nakakaintindi si Zhang ng Tagalog na salita at posible umanong hindi lamang sila nagka-intindihan ni PO1 William Cristobal.
Nang datnan umano ni Saplato si Zhang sa kulungan sa Mandaluyong Police ay iyak ito ng iyak.
Giit ng foster parent, walang bisyo at laging nasa bahay lamang si Zhang sa 5 taong pananatili nito sa bansa bilang estudyante.