Paghahain ng deportation case laban sa Chinese na nanaboy ng taho sa pulis sa MRT, inirekomenda ng legal division ng BI

Inirekomenda na ng Bureau of Immigration (BI) Legal Division ang paghahain ng deportation case laban sa babaeng Chinese na nanaboy ng taho sa isang pulis sa MRT-3.

Ayon kay BI Spokesperson Dana Sandoval, may nakitang sapat na batayan ang legal team ng ahensya upang ipatapon palabas ng bansa si Jiale Zhang.

Sinabi ni Sandoval na maaring maghain ng motu proprio case ang BI laban sa dayuhan.

Mayroon naman aniyang mga patunay na nangyari ang insidente gaya na lamang ng mga larawan na kumalat sa social media.

Kahapon ay inilabas din ang CCTV footage sa loob ng MRT-3 Boni Station kung saan naganap ang pananaboy.

Bagaman kinasuhan na ng PNP ang dayuhan sa kaniyang ginawa ay wala pang naghahain ng deportation case laban dito sa BI.