Balik na sa normal ngayong umaga ang buhay ng mga negosyante at mga namamasyal sa Roxas Boulevard matapos ang naganap na APEC Summit noong isang linggo.
Isang linggo ring malinis sa publiko at vendors ang baywalk matapos ideklara ang ‘no walk zone’ sa lugar bilang bahagi ng seguridad na ipinatupad para sa APEC summit.
Ngayong araw, maagang pumwesto sa Roxas Boulevard ang mga tindero at tindera maging ang mga pamilyang sa baywalk na natutulog.
Si Mang Larry De Mirasol, maaga sa baywalk para magtinda ng isda.
Ayon kay Mang Larry noong isang linggo na bawal siyang magtinda sa baywalk ay nawalan siya ng hanapbuhay.
Dahil dito namasukan muna siya bilang tagatalop ng bawang sa Baseco compound para lamang may maiuwing pera sa pamilya.
Sinabi ni Mang Larry na malaki ang epekto sa kaniya ng paghihigpit sa baywallk dahil sa isang sakong bawang na kaniyang tinatalupan ay P70 lamang ang kita niya.
Maghapon umano niyang binabalatan ang isang sakong bawang.
Sa pagtitinda naman ng isdang salinyasi at bitbit sa baywalk, ilang minuto pa lamang siya sa kaniyang pwesto ay kumite na siya ng P150.