Nagdulot ng tensyon sa mga tao sa palibot ng GT Tower sa Makati City, ang pag-akyat ng isang lalaki sa naturang gusali.
Sa mga video na ibinahagi sa social media makikita ang lalaki na nakasuot ng itim na pang-itaas at dilaw na pants na mabilis na inaakyat ang 45 palapag na GT Tower.
Inakala ng mga nagtatrabaho sa lugar na ang isa iyong insidente ng suicide o magtatangkang tumalon sa gusali ang lalaki.
Pero ang naturang lalaki pala na umakyat sa gusali, ay ang tinaguriang “French Spider-Man” na si Alain Robert.
Si Robert ay isang freeclimber at wala itong ginagamit na climbing equipment sa kaniyang pag-akyat sa gusali.
Maraming gusali na rin sa iba’t ibang lugar sa mundo ang naakyat ni Robert.
Sa pagtaya ng mga nagtatrabaho malapit sa GT Tower na nag-video ng pag-akyat ni Robert, umabot ng 30-minuto ang kaniyang pag-akyat mula sa ibaba hanggang sa tuktok ng gusali.
