Malacañang: CCTV project ng DILG na popondohan ng China walang problema
Tiniyak ng Malacañang na hindi magkakaroon ng security leak sa isinusulong na P20 Billion na CCTV surveillance project ng Department of Interior and Local Government (DILG) na pinopondohan ng China.
Ayon kay Presidential Spokesman Salvador Panelo, hindi papayag si Pangulong Rodrigo Duterte na makompromiso ang seguridad sa mga lugar na lalagyan ng surveillance project.
Sa ilalim ng panukala, lalagyan ng surveiilance camera ang mga pampublikong lugar sa Metro Manila at Davao City.
Naiintindihan din aniya ng palasyo ang pagdududa ng ilang senador gaya ni Senador Ralph Recto na maaring malagay sa peligro ang Pilipinas dahil sa “Safe Philippines Project” ng DILG.
Ayon kay Panelo, may kapangyarihan naman ang pangulo na i-veto o kontrahin ang proyekto kapag nakitang alanganin ito.
Bukod sa usaping panseguridad, iginigiit din ni Recto na ang proyekto ay kulang sa pag-aaral at konsultasyon bukod pa sa minadali din umano ang surveillance deal.
“Well, siguro we understand the apprehensions of some senators but necessarily this govt will not allow any security leaks”, paniniyak pang kalihim.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.