DTI: Consumers dapat mamili sa mga supermarket dahil mas mura ang ilang produkto

Pinayuhan ng Department of Trade and Industry (DTI) ang mga consumers na mamili rin sa mga supermarket dahil mabibili ng mas mura doon ang ilan sa mga produkto.

Sa panayam ng media, sinabi ni Trade Secretary Ramon Lopez na mabibili sa mga supermarket ang nasa P50 kada kilo ng bigas at asukal; at P90 hanggang P100 kada kilo ng manok.

Iginiit pa ng kagawaran na dapat magbaba ng presyo ang ilang mga kumpanya lalo na sa mga produktong condensed milk, de lata at iba pang nagtaas ng presyo noong Christmas season.

Masaya namang ibinalita ni Lopez na walang masyadong epekto ang ikalawang bugso ng excise tax sa petrolyo sa mga presyo ng bilihin.

Matatandaang pinangangambahan ng ilang grupo na dahil sa mas mataas na buwis sa langis ay tataas ang presyo ng mga bilihin.