Ayon kay Presidential spokesman Salvador Panelo, nakausap niya mismo si House Speaker Gloria Macapagal-Arroyo at tiniyak nito na ipapasa ang budget sa Pebrero bago ang sine die.
Batid din aniya ng mga mambabatas na apektado na ang mga programa patungkol sa services at imprastraktura.
“Hindi na kailangan. I am sure they will be passing that naman. They are all concerned with the services, the infrastructures that will be affected,” pahayag ni Panelo
Apektado na rin aniya ang dagdag sweldo ng mga guro, sundalo, pulis at iba pang manggagawa sa gobyerno.
Kasabay nito, magiging moot and academic na rin aniya ang mandamus na inihain ni House Majority leader Rolando Andaya sa Korte Supreme na nag-aatas kay Budget secretary Benjamin Diokno na ilabas na ang pondo para sa Salary Standardization Law.
Ayon kay Panelo, wala nang katuturan ang reklamo ni Andaya kung maipapasa ang budget dahil awtomatikong nakapaloob na ang pondo sa 2019 national budget.