Bodega ng MMDA sa EDSA-Santolan flyover nasunog

Nasunog ang stock area ng Metropolitan Manila Development Authority (MMDA) sa EDSA-Santolan flyover sa Quezon City Biyernes ng gabi.

Ayon sa Bureau of Fire Protection, sumiklab ang apoy bandang alas-10:24 ng gabi.

Partikular na nasunog ang mga nakatambak na karton at kahoy at maging ang isang kotse.

Wala pang 15 minuto o alas-10:37 ay agad na naapula ng mga bumbero ang apoy kaya hindi na nagtaas pa ng alarma ang BFP.

Inaalam na ang sanhi ng sunog at kung magkano ang halaga ng natupok na mga kagamitan.