Naniniwala si Defense Secretary Delfin Lorenzana na walang indikasyon na magkakaroon pa ng iba pang insidente ng pambobomba sa Mindanao.
Ito ay matapos maglabas ng travel warning ang United Kingdom sa kanilang mga mamamayan sa pagpunta sa Mindanao dahil sa isyu umano ng terorismo.
Noong bisperas ng Bagong Taon ay sumabog ang isang improvised explosive device (IED) sa isang shopping mall sa Cotabato City na ikinasawi ng dalawa katao at ikinasugat naman ng 34 iba pa.
Ayon kay Lorenzana, ang advisory ng UK ay karaniwan namang ginagawa ng foreign governments at ginagawa rin ito ng Pilipinas sakaling may mga kahalintulad na pangyayari sa ibang bansa.
Samantala, sinabi ni Army 6th Infantry Division (6th ID) chief Maj. Gen. Cirilito Sobejana na isolated case ang naganap na pambobomba sa Cotabato.
Giit pa nito, marami pang ibang lugar sa Mindanao na ligtas na bisitahin ng mga turista.
Tiniyak ng military official na pinaiigting ng AFP at PNP ang seguridad sa Mindanao para kaligtasan ng lahat.