Inilabas na ng Philippine National Police o PNP ang mga artist sketch ng dalawang suspek sa pagpatay kay Ako Bicol Partylist Rep. Rodel Batocabe at police escort nito.
Ang isa sa mga suspek ay lalaki na ang edad ay tinatayang 40-anyos. Ang taas naman nito ay nasa pagitan ng 5’6” hanggang 5’8.”
Kayumanggi raw ang lalaki at may peklat sa kanang pisngi.
Ang naturang suspek ay driver umano ng isang motorsiklo na namataan sa lugar ng krimen.
Ang isa pang suspek ay lalaki na ang edad ay tinatayang 30-anyos, may taas na 5’4” hanggang 5’6.”
Nauna nang sinabi ng PNP na nasa anim na katao ang inituturing nilang “persons of interest” sa Batocabe slay.
Pumalo na sa P50 million ang reward para sa makakapagturo sa mga responsable sa pagpaslang kay Batocabe, na kandidato sa pagka-alkalde sa Daraga, Albay.