Shabu mula sa magnetic lifters posibleng nakarating na ng Mindanao

Hindi malabong nakarating na ng Mindanao ang mga nakalusot na shabu mula sa magnetic lifters na natagpuan sa General Mariano Alvarez, Cavite.

Ito ang sinabi ni Philippine Drug Enforcement Agency (PDEA) Director General Aaron Aquino sa isang panayam kahapon.

Ayon sa opisyal, batay sa impurity profiling ng PDEA sa mga narekober na shabu sa Mindanao ay mayroon itong ‘high correlation’ o pagkakatulad sa nakuhang shabu sa Maynila noong Agosto.

Ibig sabihin lamang aniya nito na kumalat na ang mga nakalusot na ipinagbabawal na gamot.

Ani Aquino, bukod sa isang lugar sa Mindanao, mayroon din silang nakuhang kaparehong shabu sa isang lugar sa Cavite at dalawa naman sa Metro Manila.