Tail end of a cold front, magpapaulan sa Silangang Visayas

Patuloy na nakakaapekto ang Hanging Amihan sa buong Luzon habang apektado naman ng tail end of a cold front ang Silangang Visayas.

Sa 4am weather update ng PAGASA, bagaman magiging maalinsangan ang panahon, posible ang mahihinang mga pag-ulan sa Luzon dahil sa Amihan.

Dahil sa epekto naman ng tail end of a cold front o pagsasalubong ng malamig at mainit na hangin, inaasahan ang mga pag-ulan, pagkulog at pagkidlat sa Silangang Visayas.

Sa nalalabing bahagi ng Visayas at buong Mindanao naman ay magiging maalinsangan ang panahon maliban na lamang sa mga panandaliang pag-ulan dulot ng localized thunderstorms.