Aprubado na sa ikatlo at huling pagbasa ng Kamara ang panukalang batas na nagbibigay ng benepisyo sa mga naulila ng mga mapapatay na hukom at mahistrado.
Sa botong 177 na ‘yes’ at zero na ‘no’ pumasa ang House Bill No. 8121.
Sa ilalim ng panukala, bibigyan ng buwanang pensyon ang mauulilang asawa at anak ng mga mahistrado ng Korte Suprema, Court of Appeals, Sandiganbayan, at Court of Tax Appeals.
Ang mga mauulila ng mga hukom ng mga lower courts na mapapatay sa pagtupad ng tungkulin ay bibigyan din ng parehong benepisyo.
Bukod sa financial assistance, bibigyan din ng scholarship sa mga state universities and colleges ang dalawang anak ng mabibiktimang hukom at mahistrado.
Itinakda din nito na kapag may kaugnayan sa trabaho ang dahilan ng kamatayan ng mahistrado o hukom, tatanggapin ng pamilya nito ang kumpletong benepisyo na katumbas ng sa associate justice ng Korte Suprema, mahaba man o maiklo ang panahon ng kanilang naging serbisyo.