Big-time rollback ng mga kumpanya ng langis epektibo ngayong araw at bukas

Epektibo ngayong araw ang bawas sa presyo ng produktong petrolyo ng kumpanyang Jetti.

Sa abiso ng Jetti, alas 6:00 ng umaga epektibo ang P2.30 bawat litro na bawas sa presyo ng kanilang diesel at P1.10 sa bawat litro ng gasolina.

Ang iba pang kumpanya, may parehong halaga ng rollback sa kanilang produktong petrolyo bukas.

Unang magpapatupad ng rollback ang Caltex, alas 12:01 ng madaling araw. Habang ang iba pang kumpanya gaya ng Shell, PTT Philippines Petro Gazz, at Total ay alas 6:00 ng umaga ang rollback.

Una nang nagpatupad ng rollback ang kumpanyang Phoenix Petroleum Philippines noong tanghali ng Sabado habang ang Seaoil naman ay alas 6:00 ng umaga naging epektibo ang rollback.