Mga botanteng ‘incomplete’ ang biometrics, pwede pa ring makaboto-Comelec
Papayagan na rin ng Commission on Elections o COMELEC na makaboto ang mga botante na hindi nakumpleto ang biometrics registration.
Ito ang sinabi ni COMELEC Spokesman James Jimenez, batay na rin sa bago nilang resolusyon 10013.
Sa pulong-balitaan, nilinaw ni Jimenez na ikukunsidera ng komisyon na payagang makaboto sa 2016 Elections ang mga botante kung lilitaw na hindi nakumpleto ang biometrics registration dahil pumalya ang kanilang biometrics data o ‘na-corrupt’ ang kanilang biometrics.
May ilan aniyang botante ang nakapag-parehistro ngunit hindi nakumpleto ang pagpapakuha ng biometrics data dahil sa problema sa equipment o iba pang dahilan.
Ang mga ito aniya ay papayagang makaboto at maaring kumpletuhin ang pagpapakuha ng biometrics sa hinaharap.
Gayunman, nilinaw na para sa mga hindi talaga nakahabol sa biometrics registration ay tuluyan na silang matatanggal sa listahan ng mga boboto sa susunod na eleksiyon.
Naniniwala aniya ang komisyon na sa pamamagitan ng naturang bagong resolusyon ay mababawasan pa ang bilang ng mga hindi makakalahok sa halalan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.