Pagpatay sa abogado ng NUPL kinondena ng EU

Kinondena ng European Union ang pagpatay sa abogadong si Atty. Benjamin Ramos noong November 6.

Sa pahayag ng EU Delegation to the Philippines, mariing nitong tinuligsa ang pagpaslang sa secretary general ng Negros Occidental Chapter ng National Union of Peoples’ Lawyers (NUPL).

Nagpaabot din ng pakikiramay ang EU sa pamilyang naulila ni Ramos at sa kaanak ng mga nasawing magsasaka sa Sagay sa naganap na pananambang noong October 20.

Si Ramos ay abugado ng National Federation of Sugar Workers sa Negros Occidental at tumutulong sa mga magsasaka matapos ang pagpaslang sa siyam na sugar cane farmers.