Kapitan ng barangay sa Rodriguez, Rizal at kaniyang misis arestado sa kasong estafa
Arestado ang kapitan ng barangay sa bayan ng Rodriguez sa lalawigan ng Rizal at ang kaniyang misis dahil sa kasong estafa.
Batay sa reklamo, milyun-milyon ang natangay ng mag-asawa mula sa mga nahikayat nilang mag-invest sa kanilang trucking business.
Sa bisa ng warrant of arrest, inaresto ng mga tauhan ng PNP-Criminal Investigation and Detection Group si Erik Jacinto na kapitan ng Barangay Rosario at asawang si Analyn.
Isa sa mga nagsampa ng reklamo laban sa mag-asawa ang isang dating OFW na nag-invest ng P5.3 million mula 2015 hanggang 2018.
Pero hindi naibalik ang pangakong kita ng mag-asawa sa kaniyang ininvest na pera.
Isa ring negosyante ang nag-invest naman ng P1.8 million.
Ayon kay SPO2 Romeo Panaligan ng PNP-CIDG, lehitimo naman ang kumpanya ng mag-asawa pero nang kanilang suriin ay hindi sila kunektado sa mga proyektong kanilang ibinibida sa mga nag-iinvest.
Katwiran naman ni Analyn Jacinto, personal nilang kilala ang mga nag-invest at nagkaroon lamang ng problema ang kanilang kumpanya kaya hindi nila naibigay ang interest ng mga ininvest nilang pera.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.