Higit apat na milyong Filipino ang inaasahang bibisita sa mga sementeryo sa Metro Manila sa November 1 ayon sa National Capital Region Police Office (NCRPO).
Ayon kay NCRPO Chief Director Guillermo Eleazar, mula sa 3,583,765 milyong katao noong 2017 ay lalaki pa ang bilang ng mga bibisita sa mga sementeryo ngayong taon.
Sa Manila North at Manila South Cemeteries pa lamang ay inaasahang dadagsa ang nasa 1.5 milyong katao.
Bunsod nito ay masusi ang preparasyon ng NCRPO para tiyakin ang seguridad sa paggunita ng Undas.
Ayon kay Eleazar, 2,556 na pulis ang ipakakalat sa 78 sementeryo habang 234 naman sa 38 mga columbariums.
Maglalagay ng police assistance desks sa lahat ng trangkahan ng mga sementeryo upang tugunan ang pangangailangan ng publiko kabilang ang isyu ng kriminalidad.
Bukod dito, sisiguruhin din anya ng NCRPO ang seguridad sa 296 na bus terminals, PNR, MRT-3, LRT 1 at 2 at apat na paliparan.