Sinabi ni Presidential Spokesman Salvador Panelo na nagkausap na sina Solicitor General Jose Calida at Justice Sec. Menardo Guevarra at nagkasundo ang dalawa na ang DOJ na muna ang maghahain ng motion for reconsideration sa Makati RTC.
Sakali aniyang ma-deny ang mosyon ng DOJ sa korte ay saka lamang kikilos ang Solgen para umapela sa C.A.
Agad namang nilinaw ni Panelo na walang ginagawang utos o hindi pinapakialaman ni Pangulong Rodrigo Duterte ang kaso ni Trillanes.
Kahapon lamang sa press briefing, sinabi ni Panelo na hindi na maghahain ng MR ang gobyerno at sa halip ay didretso na ang Solgen sa C.A para maghain ng apela.
Nilinaw rin ni Panelo na hindi nakikialam ang pangulo sa kaso ni Trillanes.
“Walang latest directive si Presidente. Di nakikialam si Presidente diyan palaging pinapabayaan niya ‘yung mga sangay magdesisyon. Ever since ganyan ang style niya”, paliwanag ng kalihim.