Pagbasura sa hirit na arrest warrant vs Trillanes iaapela ng SolGen sa CA

Ihahain ni Solicitor General Jose Calida sa Court of Appeals ang apela sa pagbasura ng Makati Regional Trial Court sa mosyon ng pamahalaan na ipaaresto si Sen. Antonio Trillanes IV.

Ito ay matapos ibasura kahapon ni Makati RTC branch 148 Judge Andres Soriano ang hirit ng pamahalaan na mag isyu ng warrant of arrest laban kay Trillanes matapos ipawang bisa ni Pangulong Rodrigo Duterte ang tinatamasa niyang amnestiya.

Ayon kay Presidential Spokesman Salvador Panelo, nakausap na niya si Calida Martes ng umaga at sinabi nitong maghahain siya ng motion for reconsideration sa CA.

Kinukwestyun din ni Panelo ang naging desisyon ni Soriano gayung hindi naman nakita nito ang dokumento kaugnay sa naging aplikasyon ni Trillanes para sa amnestiya.