Drug test para sa mga kandidato pwedeng ituloy ayon sa Malacañang
Pinag-aaralan ng Malacañang ang panukala ng Philippine Drug Enforcement Agency (PDEA) na magpatupad ng mandatory drug test sa mga kandidato sa 2019 midterm elections.
Ipinaliwanag ni Presidential Spokesman Salvador Panelo na maganda ang nasabing suhestyon ng PDEA para matiyak na hindi gumagamit o kaya ay sangkot sa iligal na droga ang mga kandidato sa halalan.
Aminado naman ang opisyal na tiyak na marami ang papalag sa panukala dahil sa naunang desisyon ng Supreme Court.
May desisyon kasi ang Mataas na Hukuman na nagsasabing hindi obligadong magpa-drug test ang mga kandidato dahil wala naman ito sa Saligang Batas.
Nauna nang inihain ng Dangerous Drugs Board ang nasabing panukala ilang taon na ang nakalilipas pero hindi ito nakalusot sa hukuman.
Ayon kay Panelo, “What we see, however, as problematic is the proposed conduct of such tests for those seeking a seat in Congress, whether in the Senate or in the House of Representatives, in the upcoming elections. This is because the Supreme Court has already pronounced, in the case of Social Justice Society v. Dangerous Drugs Board, that mandatory drug testing for senators is not allowed as it imposes additional qualifications beyond the provision of the Constitution”.
Pero sa mga walang itinatagong isyu sa droga, sinabi na Panelo na magandang maging halimbawa sa publiko ang pagpapa-drug test para patunayan na hindi sila drug user.
Nauna na ring inilutang ng PDEA ang panukala na isapubliko ang pangalan ng mga pulitiko sa narco list para mabigyan ng paalala ang publiko sa pagpili ng kanilang mga ihahalal sa 2019.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.