NPA posibleng nasa likod ng pananambang sa mga pulis sa Camarines Sur

Posibleng New People’s Army ang nasa likod ng pananambang sa police escorts ng direktor ng Food and Drug Administration sa Camarines Sur.

Ayon kay Col. Paul Regencia, tagapagsalita ng 9th infantry division ng Philippine Army, posibleng paghihiganti ang pakay ng ginawang ambush na ikinasawi ng tatlong pulis.

Noong October 14 kasi nakasagupa ng mga sundalo ang mga pinaniniwalaang miyembro ng NPA sa Labo, Camarines Norte.

Sa nasabing sagupaan, dalawang sundalo ang nasawi at may mga nasugatan din.

Sinabi ni Regencia na dahil sa nasabing bakbakan ay napigilan ang mga planong pag-atake ng NPA.

Maari aniyang natyempuhan ng mga rebelde ang pagdaan ng convoy ng mga pulis na patungo ng Daet, Camarines Norte at tinambangan ito.