Abby Binay sinamahan ng ama sa paghahain ng kaniyang COC

Nagsumite na ng kaniyang certificate of candidacy para muling tumakbong mayor ng Makati City si Mayor Abby Binay.

Kasabay ni Binay na naghain ng COC si Vice Mayor Monique Lagdameo at ang buong slate sa ilalim ng United Nationalist Alliance (UNA).

Sinamahan din si Mayor Binay ng kaniyang ama na si dating Vice President Jejomar Binay.

Ang nakatatandang binay ay tatakbo namang kinatawan sa unang distrito ng Makati.

Sa paghahain ng COC ng partido ni Binay, napuno ng mga tagasuporta ang loob at labas ng Comelec office sa Makati.

Kontrobersyal ang eleksyon sa Makati dahil ang kapatid ni Mayor Abby na si dating Mayor Junjun Binay ay naghain na rin ng COC at magiging magkatunggali sila sa eleksyon.