Inanunsyo ng World Bank ang paglalabas nito ng kabuuang $496.25 o P26 bilyon na halaga ng pautang bilang tulong sa gobyerno ng Pilipinas sa isinasagawang rehabilitasyon sa mga biktima ng Bagyong Ompong.
Sa pahayag ni Mara K. Warwick, ‘World Bank country director for Brunei Darussalam, Malaysia, Philippines and Thailand’, sinabi nitong nakikiisa sila sa mga Filipino na naapektuhan ng kalamidad at tiniyak ang suporta sa pangangailangan ng bansa.
Ayon sa multilateral lender, sa pamamagitan ng Catastrophe-Deferred Drawdown Option (Cat-DDO 2) matutulungan ang pamahalaan na tugunan ang pangangailangan ng mga pamilya at komunidad; maitayo ang mga pangunahing imprastraktura; at maibalik ang social services.
Sa ilalim din ng programa ay maihahanda ang Pilipinas sa mga kalamidad sa hinaharap.
Ang Cat-DDO ay isa lamang sa mga uri ng tulong na ipinagkakaloob ng World Bank sa mga bansa upang makabangon ito sa mga kalamidad.
Matatandaang idineklara ni Pangulong Rodrigo Duterte ang state of calamity sa apat na rehiyon dahil sa pinsalang iniwan ng Bagyong Ompong.