Nahaharap sa patong-patong na reklamo ang kontrobersyal na duo na sina PCOO Assistant Secretary Mocha Uson at blogger na si Andrew Olivar, dahil sa sign language video ng mga ito na inalmahan lalo na ng sektor ng person with disabilities o PWDs.
Pinangunahan ng Philippine Federation of the Deaf o PFD ang pagsasampa sa Office of the Ombudsman ng reklamong paglabag sa RA 9442 o amended Magna Carta for Disabled Persons, RA 6713 o Code of Conduct & Ethical Standards for Public Officials and Employees, at RA 10175 o Cybercrime Prevention Act.
Maliban dito, sina Uson at Olivar ay inireklamo rin dahil sa paglabag Civil Code of the Philippines at UN Convention on the Rights of PWDs.
Ayon kay Carolyn Dagani, presidente ng PFD, “traumatizing” para sa kanilang mga PWD ang ginawang pagkutya nina Uson at Olivar.
Kanyang personal na hamon kay Uson, magbitiw na sa pwesto o kung hindi ay mismong si Presidente Rodrigo Duterte na ang magpatalsik kay Mocha sa pwesto.
Sinabi naman ni Lauro Pursill, kinatawan ng blind sector, walang ethics at walang paggalang si Uson sa mga taong may kapansanan.
Aniya pa, nilalagay ni Uson sa kahihiyan ang gobyerno kaya sana ay gumawa raw ng paraan si Pangulong Duterte na maturuan ang mga tauhan niya na igalang ang mga Pilipino, may kapansanan man o wala.
Hindi rin tinanggap ni Mang Lauro ang sorry nina Uson at Olivar, at sa halip ay iginiit na maparusanan ang dalawa.
Kinumpirma naman ni Liza Martinez, isa sa mga complainant, na kasama sa kanilang reklamo laban kina Uson at Olivar ang kontrobersyal ding “Pepedederalismo” video na umani rin ang puna mula sa publiko dahil sa umano’y kabastusan nito.
