Nangyari ang kaguluhan habang nagsasagawa ng caucus ang mga kongreista bago ang sana ay plenary debate kaugnay sa panukalang 2019 national budget.
Nang tanungin ng mga mamamahayag ay sinabi ni Villafuerte na masyadong mainit sa kanya si Andaya.
“Tignan niyo sa mga nag-viral dati ‘yung ugali niya, lumabas kanina. Nanghamon siya. Lumapit siya sa akin. I was on the mic. I was calm,” ayon kay Villafuerte.
Dagdag pa ng kongresista, “Sinigawan niya ako. Minura niya ako naghamon siya. On record ‘yan nakita naman ng lahat ng kongresista….Eh palagi naman kasing pikon ‘yun eh.”
Ipinaliwanag pa ni Villafuerte na matagal na kasing target ni Andaya ang posisyon bilang gobernador ng lalawigan na ngayon ay hawak ni Gov. Miguel Luis Villafuerte.
Sa hiwalay na panayam ay mariing itinanggi ni Andaya ang mga inihayag ni Villafuerte.
“Wala. Yung nangyari kanina usapang lalaki ‘yun. Hindi naman ako kiss and tell… Wala kaming hinahamon o binu-bully lalung-lalo na that the Speaker [former President Gloria Macapagal-Arroyo] was there”, pahayag ng House Majority Leader.
Kaagad ring nag-adjourn ang sesyon pasado alas-kwatro ng hapon at hindi natuloy ang unang naiulat na pagpapatalsik kay Davao City Rep. Karlo Nograles bilang pinuno ng House Appropriations Committee.