Ilan sa mga regional director ng Philippine National Police (PNP) ay inilipat sa ibang lugar matapos magkaroon ng reshuffle sa loob ng pambansang pulisya.
Sa isang liham na inilabas ng PNP kahapon, araw ng Lunes at may petsang September 7 ay ipinagutos ni PNP chief, Director General Oscar Albayalde ang pagtatalaga kay Highway Patrol Group (HPG) deputy chief Senior Supterintendent Eliseo Cruz bilang acting district director ng Southern Police District (SPD).
Inilipat naman ang kasalukuyang district director ng SPD na si Chief Superintendent Tomas Apolinario bilang acting regional director ng MIMAROPA Police Regional Office (PRO-4B).
Samantala, ang dati namang hepe ng PRO-4B na si Chief Superintendent Emmanuel Luis Licup ay itinalaga bilang bagong pinuno ng Zamboanga Peninsula Police Regional Office (PRO 9).