Pag-iimport ng galunggong kinastigo sa isang kongresista

Tinawag na anti-poor ni Anakpawis Rep. Ariel Casilao ang hakbang ng gobyerno na umangkat ng galunggong, bigas at iba pang agricuktural products.

Ayon kay Casilao, hindi katanggap-tanggap ang hakbang ng pamahalaan para sa bansang napapaligiran ng karagatan at itinuturing ding rice producing country.

Sinabi nito na ang tiyak na tatamaan ng polisiya ay ang mga magsasaka at mangingisda na nabibilang sa mga pinakamahihirap na sektor.

Dahil anya sa ginagawa ng administrasyon at kapag hindi ito nagbago ay lalong magugutom at maghihirap ang mga Filipino.

Idinagdag nito na hindi na natuto ang administrasyong Duterte sa aral ng nakalipas na pamahalaan matapos sumapi sa World Trade Organization.