Gulong ng eroplano pumutok pag-landing sa Dumaguete Airport; paliparan pansamantalang isinara

Isang eroplano ng Philippine Airlines ang naputukan ng gulong nang lumapag ito sa Dumaguete Airport, Martes (Aug. 14) ng umaga.

Sa abiso ng PAL, alas 6:24 ng umaga nang maganap ang insidente sangkot ang flight PR2541.

Pumutok umano ang gulong ng eroplano paglapag nito dahilan para bumara ito sa runway.

Ligtas namang naibaba ang lahat ng pasahero ng 156 seater na Airbus A320.

Habang hinihintay na mahatak ang eroplano ay nagpasya ang Civil Aviation Authority of the Philippines (CAAP) na isara ang runway.

Dahil dito naapektuhan ang lahat ng biyahe na mula at patungong Dumaguete.