Mamayang alas-6 ng umaga ay magpapatupad ng kaunting dagdag-presyo ang mga kumpanya ng langis sa kanilang mga produkto.
Tataas ng 15 sentimo ang bawat litro ng gasolina, habang 25 sentimo naman ang para sa kada litro ng diesel.
Samantala, wala namang paggalaw sa presyo ng kerosene o gaas.
Kabilang sa mga nag-anunsyo ng taas-presyo ang mga kumpanyang Eastern Petroleum, Caltex, Flying V, Jetti, Petro Gazz, Petron, Phoenix Petroleum, PTT, SeaOil, at Shell.
Sa ngayon ay wala pang anunsyo ang mga kumpanyang Total at UniOil kaugnay sa price adjustment.
Ang panibagong taas-presyo sa mga produktong petrolyo ay dahil sa pagmahal ng halaga ng krudo sa pandaigdigang merkado. Sa ngayon kasi nasa pagitan ng USD67.63 hanggang USD72.96 ang halaga ng krudo.