Mga korte na apektado ng pag-ulan at pagbaha pinayagang magsuspinde ng pasok ngayong araw

Pinayagan ng Korte Suprema na magsuspinde ng pasok ngayong araw sa mga korte sa Marikina City bunsod ng naging epekto ng ulan na dulot ng Habagat.

Sa abiso ng Public Information Office ng Supreme Court, binigyang go signal ni Supreme Court Acting Chief Justice Antonio Carpio ang executive judge ng Marikina na magsuspinde ng operasyon.

Kasama din sa pinapayagan na magsuspinde ng operasyon ngayong araw ang iba pang mga lugar na labis na naapektuhan ng pagbaha at pag-ulan.

Ang Marikina City ang labis na naapektuhan ng pagbaha sa Metro Manila bunsod ng naranasang pag-ulan mula pa noong Sabado.