12 migrante patay sa aksidente sa Italy

Patay ang labingdalawang migrant agricultural workers makaraang maaksidente ang sinasakyan nilang van sa Southern Italy.

Naganap ang aksidente sa lungsod ng Foggia sa Puglia.

Maliban sa 12 nasawi, mayroon pang tatlong sugatan.

Taun-taon kada summer, libu-libong migrante mula sa iba’t ibang bahagi ng Europa at Africa ang dinadala sa nasabing bahagi ng Italya para magtrabaho sa taniman ng kamatis.

Sa ganitong panahon kasi ang anihan ng mga kamatis sa lugar.

Ibabalik na sana sa kanilang pansamantalang tinutuluyan ang mga migrante matapos ang buong araw na pagtatrabaho nang maganap ang aksidente.