Umamin ang Los Angeles Police Department (LAPD) na isa sa kanilang hanay ang nakabaril sa empleyado ng Trader Joe’s na nagresulta sa kanyang pagkamatay.
Matatandaang kamakailan ay nagkaroon ng hostage at shooting incident sa nasabing supermarket sa California, kung saan isa ang namatay.
Ayon kay LAPD Chief Michel Moore, lumabas sa kanilang imbestigasyon, partikular sa body camera footage na hindi sinasadyang nabaril ng isa sa kanilang mga pulis ang biktimang si Melyda Corado habang tinutugis nila ang suspek sa hostage at shooting incident na si Gene Evin Atkins.
Paliwanag ni Moore, habang tumatakbo si Atkins ay pinaputukan nito ang mga otoridad, dahilan upang gumanti ng putok ang mga pulis.
Ngunit habang tumatakbo papasok sa Trader Joe si Atkins ay sakto namang tumatakbo palabas si Corado, dahilan upang imbes na si Atkins ang mabaril ay si Corado ang tinamaan.
Sa ngayon ay nananatiling nakasara ang supermarket kung saan mayroong isinasagawang memorial para kay Corado.