Shortlist ng JBC para sa susunod na Ombudsman inilabas na
Inilabas na ng Judicial and Bar Council (JBC) ang shortlist ng tatlong kandidato na posibleng humalili kay Ombudsman Conchita Carpio Morales na nakatakdang magretiro sa susunod na lingo.
Kinabibilangan ito nina Supreme Court Associate Justice Samuel Martires, Ombudsman Special Prosecutor Edilberto Sandoval at Atty. Felito Ramirez.
Hindi kasama sa listahan si Labor Secretary Silvestre Bello III makaraang ma-disqualified sa nasabing posisyon kaugnay ng naka-pending na kasong syndicated estafa na nakahain naman sa Department of Justice (DOJ).
Sa botohan ng JBC, si Martires ang may pinakamaraming boto na nakakuha ng anim, habang si Sandoval ay mayroong lima at apat kay Ramirez.
Ang nasabing shortlist ang pagpipilian ni Pangulong Rodrigo Duterte bilang kapalit ni Morales.
Kung si Martires ang mapipili ni Pangulong Duterte, pipili din ito ng isa pa bilang kapalit naman nito sa Supreme Court.
Si Martires ang first appointee ng Chief Executive sa mataas na hukuman.
Bago naman ma-appoint sa Office of the Special Prosecutor, si Sandoval ay naging Presiding Justice ng Sandiganbayan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.