Biyahe ng PNR sinuspinde dahil sa binahang riles ng tren

Nagkansela na rin ng mga biyahe ang mga tren ang Philippine National Railways (PNR) dahil sa mga riles na lubog sa tubig baha.

Sa abiso ng PNR sa kanilang Facebook at Twitter, ang bahagi ng Magsaysay crossing, Paco Station at Dimasalang ay lubog sa tubig baha.

Nasa pagitan ng 3 inches hanggang 5 inches ang lalim ng naitalang pagbaha sa mga riles.

Bunsod nito, nakansela na ang magkakasunod na biyahe ng tren na patungo sa Alabang gayundin ang magkakasunod na biyahe patungo ng Tutuban.

Ayon sa PNR, stranded ang kanilang mga tren sa bahagi ng Alabang, Sucat, Dela Rosa, Vito Cruz at Pandacan Stations.