Patay ang dalawang tulak ng droga, habang arestado naman ang dalawang iba pa sa ikinasang buy bust operation ng mga pulis sa Barangay Parian, Calamba, Laguna.
Kinilala lamang sa alyas na JonJon at Tubo ang isa sa mga nasawing suspek, habang ang kanyang kasama naman ay walang pagkakakilanlan.
Nabatid na si alyas JonJon ay kabilang sa drugs watchlist at suspek din sa carnapping.
Nakilala naman ang dalawang arestadong tulak ng droga na sina Sherwin Avenido at Arvey Palomique na kapwa newly identified drug personality.
Ayon sa Calamba Provincial Police, nang matunugan ng mga suspek na pulis pala ang kanilang katransaksyon ay agad silang nagpaputok.
Gumanti ang mga pulis na nagresulta sa pagkamatay ng dalawa, habang pareho namang nakaligtas sina Avenido at Palomique.
Narekober mula sa mga tulak ang dalawang kalibre 38 baril at siyam na pirasong sachet na naglalaman ng hinihinalang shabu, na mayroong street value na P15,000.
Mahaharap sina Avenido at Palomique sa kasong paglabag sa Republic Act 9165 o Comprehensive Dangerous Drugs Act of 2002.