Nilinaw ng Malacañang na tanging ang pagiging officer-in-charge ng Philhealth ang inalis na posisyon kay Celestina Maria Jude Dela Serna.
Ayon kay Presidential Spokesman Harry Roque, mananatili pa si Dela Serna bilang board member ng Philhealth bilang kinatawan ng sektor ng mga Overseas Filipino Workers.
Una rito, sinabi ni Doque na sinibak ni Pangulong Rodrigo Duterte si Dela Serna dahil sa sobrang pagbiyahe at hindi tamang pamamahala sa pondo ng Philhealth.
Isang senior official sa palasyo aniya ang nagsagawa ng imbestigasyon kaugnay kay Dela Serna at inirekoemnda sa pangulo na sibakin na ang opisyal.
Sinabi ni Roque na malabong maipatupad ang programa ni Pangulong Duterte na universal health care program kung hindi maayos ang namamahala sa Philhealth.
Kasabay nito, sinabi ni Roque na officer-in-charge na muna ang posisyon ngayon ni Philhealth board member Dr. Roy Ferrer.
Nilinaw ng opisyal na wala pa kasing napipiling permanentng kapalit ang pangulo sa puwesto ni Dela Serna.
Matatandaang aabot sa P9 Billion ang nawala sa pondo ng Philhealth sa mga nakalipas na taon.