Bandang alas-12:10 ng hatinggabi nang magsagawa ng buy bust operation ang Pandi Police sa Barangay Pinagkwuartelan laban kay Dexter Allan Dela Cruz alyas Bakal.
Sa gitna ng transaksyon ay natunugan umano ni Dela Cruz na pulis pala ang kausap, dahilan upang paputukan ang mga ito na silang gumanti rin ng putok at nagresulta sa pagkamatay ng drug suspek.
Nakatakas naman sakay ng dalawang motorsiklo ang dalawang kasamahan ni Dela Cruz.
Ayon sa mga otoridad, dati nang sumuko sa Oplan Tokhang ng pamahalaan si Dela Cruz ngunit bumalik sa kalakaran ng iligal na droga.
Halos limang minuto pa lamang ang nakalilipas ay isa pang buy bust operation ang nauwi sa engkwentro sa Barangay Masantol sa bayan ng Balagtas.
Kinilala lamang ang napatay na suspek sa alyas Lito Onse na kilala umanong supplier ng droga at residente ng Marilao.
Nakatakas rin ang kasamahan ni Lito Onse sakay ng isang motorsiklo.
Samantala, makalipas ang 15 minuto ay sa bayan ng Obando naman ay napatay rin ng mga otoridad ang isa pang kilalang tulak sa lugar na kinilala lamang sa alyas na Ali.
Ayon sa mga otoridad, may kasama rin si alyas Ali nang isagawa ang buy bust operation sa Barangay Paco ngunit nang magkaputukan ay nakatakas ang kasama nito sakay ng isang motorsiklo.
Lahat ng apat na mga kasamahan ng napatay na drug suspek ay tinutugis ng mga otoridad.
Samantala sa Pulilan, isang tricycle driver ang nasawi makaraang manlaban din sa ikinasang buy-bust ng mga otoridad.