Patay ang isang hinihinalang miyembro ng Akyat-bahay gang makaraang manlaban sa isang pulis nang maaktuhan siyang pinapasok ang isang bahay sa Rodriguez, Rizal.
Naganap ang insidente sa Barangay San Rafael sa nasabing bayan alas 3:00 ng madaling araw.
Ayon kay Chief Supt. Guillermo Eleazar, Regional Director ng Calabarzon Police, pinasok ng hindi nakilalang suspek ang bahay ng biktimang si Suzette Kareen sa Green Rose Subdivision.
Tinangka umano ng suspek na kunin ang cellphone ng biktima dahilan para magsisigaw ito at humingi ng tulong.
Nagkataon namang nakatira sa ‘di kalayuan ang pulis na si PO1 Antonio Perez na agad sumaklolo nang marinig ang komosyon.
Habang hinahabol ng pulis ang suspek ay bumunot ito ng baril pero naunahan na ito ng putok ni Perez.