Tiniyak ng Department of Foreign Affairs (DFA) na patuloy nitong binabantayan ang sitwasyon ng mga Filipino sa Hawaii.
Bunsod ito ng patuloy na pagputok ng Mt. Kilauea na sinasabing magkakaroon pa ng mas malalang mga pagsabog.
Ayon sa DFA, minomonitor ang Filipino Community sa pamamagitan ng Philippine Consulate General sa Honolulu.
Ayon kay Consul General Joselito Jimeno, walang Pinoy ang napaulat na naapektuhan ng pagsabog ng bulkan.
Nasa humigit-kumulang 15,000 Filipino ang naninirahan sa Hawaiii kung saan 500 ay nasa hilagang bahagi ng apektadong lugar.
Sinabi ni Jimeno na tiniyak sa kanya ni Hawaii Governor David Ige ang kahandaan ng Hawaii National Guard na ilikas ang mga Filipino na posibleng maapektuhan ng pagsabog ng bulkan.
Naglabas ng red alert ang US Geological Survey noong Martes sa posibleng nakaambang malalang pagsabog ng Kilauea.