Pinalaya ng ilang tiwaling mga kawani ng Bureau of Immigration o BI ang Koreanong si Seongdae Cho kapalit ng isang milyong piso.
Si Cho ang detainee ng BI sa Bicutan, Taguig na misteryosong nawala habang nakakulong ngunit nahuli rin nitong nakaraang Sabado.
Ayon kay Immigration Commissioner Siegfred Mison, nasa sampung tauhan ng ahensya nagsabwatan upang makalabas ng kulungan ang dayuhan na sangkot sa kaso ng human trafficking.
Sa kanyang muling pagkakadakip, inginuso ni Cho ang sampung BI personnel na hindi muna pinangalanan na tumanggap ng isang milyong pisong suhol para siya’y makalabas ng detention facility at makatakas.
Ang mga kawani ng BI na sangkot sa krimen ay sasalang sa imbestigasyon ayon kay Mison.
Si Cho ay inaresto ng BI dahil sa pagbebenta ng mga kababaihan sa mga kapwa niya Koreano at pagkatapos ay ipa-eentrap ang mga ito sabay kikikilan ng hanggang 5 milyong piso upang hindi na makasuhan.
Sangkot din ang dayuhan sa pangingikil at robbery-extortion dito sa Pilipinas at Korea.