Inihayag ng transport network company na U-Hop na kanilang magiging business partner ang dating boxing champion na si Floyd Mayweather Jr.
Inihahanda na ang nasabing partnership para sa worldwide expansion ng U-Hop.
Sinabi ni U-Hop Chairman Marvin Dela Cruz na balak ng kanilang kumpanya na dalhin ang kanilang transport network service sa U.S at sa iba pang panig ng mundo.
Malaking tulong umano sa kanilang grupo si Mayweather dahil sa resources at koneksyon ng nasabing boxing great.
Aminado rin si Dela Cruz na mas madaling makikilala sa ibang bansa ang U-Hop dahil sa pangalan ni Mayweather.
Gayunman ay tumanggi na si Dela Cruz na ibigay pa ang ilang detalye sa nasabing partnership.
Sa hiwalay na pahayag ay sinabi ni Mayweather na isang maayos na kumpanya ang U-Hop at kanyang hinikayat ang publiko na tangkilikin ito.