Pinasususpinde sa Jollibee ang online delivery system nito dahil sa isyu ng privacy.
Ayon sa National Privacy Commission (NPC), nasa high-risk exposure ang data ng nasa 18 million na katao na nasa online delivery database ng Jollibee dahil sa kahinaan ng kanilang sistema.
Inutusan ng NPC ang sikat na fast food na suspendihin ang operasyon ng kanilang online delivery system hanggang matugunan ang problema.
Kaugnay ng uri ng lumantad na personal na impormasyon, sinabi ng head ng NPC Complaints and Investigation Division na si Francis Euston Acero na hindi pa nila ito maibubunyag sa ngayon.
Pero sinabi ni Acero na pareho ito sa kaso ng isa pang fast food chain na Wendy’s fastfood na naharap sa katulad na privacy concern.
Ang kaibahan aniya ay ang database ng Wendy’s ay na-breach o napasok habang sa Jollibee ay mayroon lang potensyal na ma-hack dahil sa kahinaan sa sistema nito.
Nadiskubre ang banta noong December 2007 nang mapuna ng isang cybersecurity company ang security gap sa online delivery system ng Jollibee.
Sinabi pa ng ahensya na nitong Pebrero, mahina pa rin ang site na maski ang mayroon lang na kaunting kaalamang teknikal ay pwedeng mapasok ang personal information ng mga customer ng Jollibee na nag-order online o sa pamamagitan ng kanilang website.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.