Sugatan ang 26 na pasahero makaraang sumalpok sa puno ang isang pampasaherong bus sa isang padausdos na kalsada sa Brgy. Minuyan, San Jose del Monte, Bulacan, Huwebes ng gabi.
Wasak na wasak ang harapan ng bus dahil sa lakas ng impact.
Biyaheng Sapang Palay Baclaran ang naaksidenteng bus at pagmamay-ari ng Mayami Trans.
Ayon sa isa sa mga pasahero, ipinaalam sa kanila ng driver na kinilalang si Jovet Villegas, 27 anyos na nawalan ng preno ang kanilang sinasakyan.
Nag-abiso ang driver sa mga pasahero na kumapit nang mahigpit at ibabangga niya ito.
Bunsod nito, nagtamo ng sugat at pawang duguan ang mga ulo at mukha ng mga pasahero.
Bago bumangga ay kumalas na ang driver sa manibela at kumapit na lang din nang mahigpit.
Naisugod na ang mga nasugatan sa Sapang Palay Disctrict Medical Center habang hawak na ng pulisya ang driver.