Si Executive Secrerary Salvador Medialdea ang mangunguna sa commemoration rites ng ika-76 na Araw ng Kagitingan ngayong araw sa Mount Samat Shrine sa Pilar, Bataan.
Kakatawan si Medialdea kay Pangulong Rodrigo Duterte na nakatakdang lumipad patungong China ngayong araw rin na ito para dumalo sa Boao Forum.
Makakasama ni Medialdea sa commemoration rites sina Japanese Ambassador to the Philippines Koji Haneda at ang charge d’ affaires ng US Embassy na si Michael Klecheski.
Magsisimula ang programa alas-9 ng umaga sa pamamagitan ng wreath laying ceremony na pangungunahan nina Haneda, Klecheski at Medialdea.
Ang wreath laying ceremony ay bilang pagbibigay pugay sa mga bayani ng World War II.
Bukod sa tatlong opisyal ay nakatakda ring magbigay ng kanilang mga mensahe sina Bataan Governor Abet Garcia at National Historical Commission of the Philippines Chairman Dr. Rene Escalante.
Ang tema ng selebrasyon ng makasaysayang araw na ito ngayong taon ay ‘Kagitingan at Pagmamahal sa Pilipinas para sa Tunay na Pagbabago’.