Mga nalunod sa kasagsagan ng bakasyon at Mahal na Araw, pumalo na sa 37 ayon sa PNP

Pumalo na sa mahigit tatlumpu ang bilang ng mga nasawi sa iba’t ibang bahagi ng bansa dahil sa insidente ng pagkalunod nitong bakasyon at Mahal na Araw.

Ayon sa Philippine National Police, mula March 23 hanggang April 2 ng alas-12 ng tanghali, sa kabuuang 43 drowning incidents ay 37 ang naitala nilang patay.

Pinakamaraming nasawi sa pagkalunod ang Region 4A o CALABARZON na umabot sa sampu.

Habang sinundan naman ito ng Region 3 na may walong patay.

Anim naman ang namatay dahil sa pagkalunod sa Region 2, 4 sa Region 5, 2 sa Region 11 at tig-1 ang patay sa Region 1, Region 4B, Region 6 at Region 7.

Kaugnay nito, nagpaalala naman ang PNP sa publiko na magbabakasyon at pupunta sa mga beach at resort na patuloy na mag-ingat kung lalangoy lalo na kung hindi sanay.

Sa ngayon, patuloy na nakataas ng alerto ang PNP lalo pa’t naka-vacation mode pa rin ang karamihan.