Satisfaction rating ni VP Binay, bumagsak ayon sa SWS survey
Bumaba ang satisfaction rating ni Vice President Jejomar Binay sa isinagawang survey ng Social weather stations sa ikatlong quarter ng taong 2015.
Nakakuha si Binay ng rating na +33 o good, na mas mababa ng siyam na puntos kumpara sa +42 noong second quarter, pero mas mataas ng bahagya sa +33 noong first quarter.
Batay sa ratings ng SWS, ang ratings na +70 ay itinuturing na “excellent”; ang +50 hanggang +69 ay “very good”; +30 hanggang +49, ay “good”; +10 hanggang +29, ay “moderate”; ang +9 hanggang -9, ay “neutral”; ang -10 hanggang -29, ay “poor”; ang -30 to -49, ay “bad”; ang -50 hanggang -69, ay “very bad”; at ang -70 pababa ay “execrable.”
Samantala, sa parehong survey, si Senate President Franklin Drilon ay nakapagtala naman ng pagtaas ng ratings.
Mula sa dating +29 o moderate, nakakuha ngayon si Drilon ng +42 o good o katumbas ng 13 points na pagtaas.
Si House Speaker Sonny Belmonte naman ay bumaba ng apat na puntos ang ratings at nanatili sa ‘neutral’ sa +5 sa ikatlong quarter ng taon.
Habang si Supreme Court Chief Justice Maria Lourdes Sereno ay bumaba naman ng 7 points ang rating matapos makakuha ng +4 o neutral mula sa +11 o moderate noong ikalawang quarter ng taon.
Isinagawa ang nasabing survey noong September 2 hanggang 5.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.