Mga babaeng miyembro ng NPA hindi daw dapat magbuntis ayon kay Pangulong Duterte

May panibagong banat si Pangulong Rodrigo Duterte sa mga babaeng miyembro ng New People’s Army.

Sa kaniyang talumpati sa general assembly ng League of Municipalities of the Philippines sinabihan ng pangulo ang mga “Amazona” na kung magrerebelde lang naman ay huwag nang manganak.

Ayon sa pangulo, dadagdagan lamang ng mga babaeng rebelde ang problema kapag sila ay magbubuntis at manganganak.

Nagpaliwanag din ang pangulo sa naging pahayag niya noon hinggil sa pagbaril sa ari ng mga babaeng rebelde.

Aniya, binanggit lamang niya iyon bilang pantakot.

Magugunitang umani ng batikos mula sa iba’t ibang grupo ng kababaihan ang nasabing pahayag ng pangulo.