Pinugutan ang isang 29-anyos na lalaki na una nang nakulong dahil sa rape at arson sa Pagadian City.
Ayon sa pulisya, narekober ang mga labi ni Alberto Empal 200 metro ang layo mula sa kanyang bahay sa Barangay Ditoray dakong alas-6:00 ng umaga noong Martes.
Ayon kay PO3 Joel Limbo, hindi pa nahahanap ang ulo ni Empal.
Sinabi ni Limbo na nakilala ng pamilya ng biktima ang katawan nito na huling nakita noong Lunes na nakikipag-inuman sa mga kapitbahay.
Ayon sa kapatid ng biktima na si Loreto, bandang alas-9:00 ng gabi ng Lunes nang marinig nila si Alberto na nagpapasaklolo.
Gayunman, hindi nila mahagilap ito dahil madilim ang lugar.
Kinabukasan, nadiskubre ng kanilang kapitbahay ang isang bangkay na walang ulo at agad nakilala na si Empal ito.
Ayon kay Limbo, iniimbestigahan pa nila ang motibo sa pagpatay kay Empal.