Escudero nagpasalamat sa endorsement ni Trillanes kay Poe
Pinasalamatan ni Sen. Chiz Escudero si Sen. Antonio Trillanes IV at sa Magdalo party-list sa page-endorso at sa paniniwalang magiging mabuting presidente ang kaniyang ka-tandem na si Sen. Grace Poe.
Tulad ni Escudero, malugod din namang pinasalamatan ni Poe ang nasabing page-endorso sa kaniya ni Trillanes at ng Magdalo.
Sa pamamagitan aniya ng pagtanggap ni Trillanes sa uri ng plataporma ni Poe, nakita ni Escudero na pareho sila ng adhikaing magkaroon ng gobyernong tunay na nagmamalasakit sa mga tao.
Bagaman makakalaban ni Escudero si Trillanes sa vice presidential race, iginiit niya na may karapatan at kwalipikado naman si Trillanes na tumakbo sa nasabing posisyon.
Matatandaang opisyal nang nagdeklara si Trillanes ng pagtakbo bilang pangalawang pangulo sa darating na eleksyon.
Bagaman kasapi ng Nacionalista Party (NP), tatakbong independent candidate si Trillanes.
Bukod sa kaniya, isa pang senador ng NP na si Sen. Alan Peter Cayetano ang tatakbo rin sa parehong posisyon, ngunit pareho silang wala pang presidential bet.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.